Friday, November 4, 2016

Puonj Bikira Maria, Legion Maria: Maria Okoro Biro Roho Mtakatifu




1.       “Aneno koth mabiro chwe e wan’g piny. To kodhni nochwe koth maber ahinya ma yedhe duto man e wan’g piny nonyag olembe, nyaka mapok ne onyago olemo.

2.      Ee, piny nonyagi, kendo piny nobed mamor kendo mahil ahinya.

3.      To kata kamano, yaye nyithinda, kik po ka n’gato otero lwete ma opono godo olemo moro ma otero e dhoge mit ochamo.


4.      Ooyo akwerou, olemogi gi kwero mar Jehova Nyasaye, kik ubilgi kata mana gi lewu.

5.       N’gat ma nobil olemogi to nolal nono gi piny, to kik chien’g oywagna kata kik chien’g oywagne Emmanuel.

6.      Koro akwerou kapok ochopo, un bende dhi unyis jowadu man kuonde moko maok otundo ka. To bende undik weche nagi ne tienge mabiro ban’gu chien’g osom.”

7.       Ji ne openjo Maria tiend wach olembego mondo gin’gegi, to nikech ogandagi ne giparo kuom yedhe manyak moti e pewe kata e puothe.

8.      Mama Maria ne okonegi ni, “Dhi upenj Jahulo Emmanuel.”

9.      Baba Messiah ne oduoko ji ni: “Luonguru jo ochokre obed piny anyisu tiend puonj Mama. Mama puonjne tek winjo, ojawuoyo gi ngeche.”

10.     Ji duto ne obedo piny ewi Got kendo ne opimo negi wach kuom ngech koth mabiro chwe. 

11.     Ruoth Messiah noyawo dhoge ma owacho ni, “Ngech koth tiende ni Roho Maler ma Nyasaye biro olo e piny ka koth, manolor kuom ringruok duto.

12.     Ngech yedhe manonyag olembe gin ji ma Roho biro mako, manolok ji e wan’g piny kuom tich Nyasaye gi lamo Nyasaye.

13.     Olembe ma yedhego onyago gin nyiri gi mon mabeyo, kod chuo gi yawuoyi, mabiro lokore kuom teko mar tich Rohono.

14.     Koro n’gato an’gata manomul dhako kata dichuo ni chodo to nolal nono. 

15.     Kendo mwandu mar pesa nodonji mondo okony kanise Nyasaye, to n’gat manocham pesago e yor richo kata n’gado wigi nolal nono.

16.     Sadaka kik ucham, kata pesa mag achiel ewi apar kik ucham. Kata mana pesa mar Harambee mag gero kanisa kuku cham.

17.     Mano e tiend puonj Bikira Maria min Ruodhwa Jesus Kristus.”

18.     Ji ne oolo riat ni, “Amen.”