Friday, February 5, 2016

Puonj Simeo Melkio, Usenge 1977, OD Ayubu, Part 1


(Thuond weche mane ruoth opuonjo Usenge od Ayubu. Opanggi kaluwore gi yiero mar jandiko)

Kara Onge Mer

1.       An kara onge kon’go. Onge siasa, onge ndawa kata nyasore.
2.       Kata sero nyiri onge ka. An’geyo ni un jorotenge uhero chode; uhero monde ji mondo uchodru godo.
3.       To kara kani koyudi to imaki. An gi sirikanda machiegni ka, ok un kendu.
4.       Kong’o akuon’go. Kon’go miyo nyiwa kethore e bache; gi toyo iye gi chuo. Nyiwa okethore e ba koda majengo, isero kuro kod pesa.
5.       In wuon nyako igalri kani ni omiyi pesa ichamo, kare ichamo pesa dwanyruok.
6.       Pesa ober ka n’gato ochiwe maler.

An Wuod Luo

7.       An wuod ja Luo asili. An wuod Luo radhianja.
8.       Awachonu ma gi thuon koro.

Weuru Akwede Mag Dinde

9.       An’geyo ni in ja-Adventist ikwedo ja Katholik ni dwanyore, to into?
10.     An’geyo ni ja Legion Maria, ifuwo kaka an, ikwedo ja Adventist ni dwanyore, to into?
11.     An’go momiyo un jo akwede? An’go momiyo in ja Katholik in ja akwede?
12.     An’go momiyo ikwedo Legion Maria kiwacho ni Legion Maria mago dinde mon to gi chotgi; mago thagalany mar jolendo?
13.     Be in’geyo ni gima idwaro ir Nyasaye ema ja Legion manyo, kendo gima ja Adventist dwaro ema ja Katholik dwaro?
14.     Ka gima imanyo en lamo Nyasaye adieri, mano ema omanyo. Kendo mano emomiyo oweyo dalagi.
15.     Ja Legion ok obiro sero nyari. Nyari ok adwar thin’ga. Chiegi thin’ga. Chuori bende thin’ga, akiae.
16.     Omiyo jowadwa, walamuru Nyasaye maonge akwede. Lam Nyasaye achiel, ihere ahinya, mondo idhi e ngima maokrum.

Dichwo Achiel, Dhako Achiel

17.     Agolonu puonj moriere tiir niya, dichwo achiel obedo mana gi dhako achiel.
18.     Dichwo riwo arus gi dhako achiel kende. To ka dhako otho, dichwo nyalo riwo arus gi dhako achiel machielo kendo.
19.     Ok onego idwar nyuomo nyako machielo kendo nikech chia mare to in kod Chiegi. Dhako bedo mana achiel.
20.     Onge riwo man’geny; kiriwo man’geny to ifuwo. Dhako bedo mana achiel kende.
21.     Koyie onyuolna, kotamore to wachwe kamano. Onge riwo man’geny nikech en mgumba. Joriw man’geny jorom gi mach!

Simeo Oor Kuomwa

22.     Nyithi Nyasaye, jorotenge wadwa, anto oora kuomu.
23.     An asayou asaya, an afuwo akia somo. To wuonwa noora konyisa ni: “Dhi ipuonj jok mofuwo kaka in.”
24.     To an ne akone ni: “Jok mofuwo kaka an onge kucho, joka riek tee. Giriek mohewa. Joka serikal tee. Kadhi puonjo gi to adhi aa nono.”
25.     To wuora nonyisa niya: “Ng’ama oyanyi e nyinga kata n’gama ogoyi e nyinga to ok rach.”
26.     Nyithindwa kare ne owacho adiera. Goch to ogoya ndi, otur n’getna ndi, owan’g goda ndi. Mago te naneno.
27.     Kare wuora ok noriambo kata matin kane onyisa ni mondo abi apuonj jok mofuwo.
28.     Wuora noora ni mondo upuk kon’go piny, upuk manyasi piny, uwe dhawo kod lwenje. Noora mondo uwe negoji, uwe chamo alote maricho.
29.     Nonyisa ni mondo akwed wechegi maler e lela. Kendo kata inega to ahul ahula. Kata igoya ngum to awach awacha.
30.     Nyithi Nyasaye, ngum oroma to awacho awacha wechegi gi thuon. Awacho ni mondo upuk kon’go, awacho ni mondo uwe juok.
31.     A jopiny masira yaye! Jo ndagla gi yaye! Ja ndagla manego nyathi n’gato machiegni nyombo. Okawo nyathi maber to onego. Ja ndagla!
32.     Ni ka wang ahulo to inega! Yawa ahulo. N’gama nego mana nyathi n’gato machiegni nyombo!
33.     Onego wuoyi, wuoyi siro, wuoyi maran’gongo. Kendo kosenege to odile kendo wuoyino chako chieno min gi wuon mare to oweyo n’gama onege.
34.     Jo ngagla wan’guru ndagla. Jo bilo wan’guru bilo. Jokuo weuru kuo.
35.     Mago kawacho to ngum oroma. Ni ok tal. Awacho! Atalo, tho! Wan’g otimre yawa. Giugo otimre atima, ayie. To nokona chon.

Simeo Okoro Yor Thone

36.     Yawa dhako majagombo chuor dhako wadgi, mach oluw pierino yaye!
37.     Owada, aa yaye! Dhako magombo chuor dhako wadgi, kendo mandiwa!
38.     Aluwo gi thuon, kata ka kiny imiya SUM E CHIEMO, ayie tho, thich!
39.     Oyawore duto! Yawa Nyasaye odagi ni kik aluwra kuom chi dichwo wadwa. Odagi, okodwar. An okwera, odagi.
40.     Anto anakweru nade. Odagi! Wuon lowo odagi e pinye.


Tuesday, January 5, 2016

Gano Kuom Simeo Melkio Part 1: Worshipping Simeo Melkio, in Luo

1.        Oyawore, Simeo yo, Melkio, kingi;
Jadolo wabiro iri, wagoyo chongwa piny mondo wadendi mamiyi duon’g;
Nyasachwa wabiro paki, wan wabiro lami nikech in miromo lamo;
Wakwayi mondo ichik iti e lembwa, mondo iwinj ywak nyithindi koro;
Donge in e mane polo ochiwi mondo wayud konyrruok kuomi;
Wan polo ema osiemonwa in, polo ema ofwenyi ne ogandawa;
Wan pok omiwa nying moro mopogore, mak mana nying Simeo taya;
Donge polo emane oori, polo emane oori e dier joraten’g;
Ma emomiyo koro wagoyo chongwa piny;
Wapaki, walami, wamiyi duon’g;
Wasayi mondo iwinjwa, winj ywak nyithindi miseko luongo;
Kaw lembwa, winj Ywakwa;
Walem mayom e n’guono Simeo, Amen.

2.        Simeo in e wuon loch polo;
In e duon’g maler ahinya, mane okelo loch polo e thurwa;
Donge in e mane iparowa, mondo ibi igolwa ei mudho kendo inyiswa ler;
In e mane iparowa ka walal ei on’gono, anjawo koda monrruok;
In emane iparowa ka walal e kuoth koda miriambo, ichlit koda sigu;
Donge in e mane polo ne owali ni iromo golo lodi mar richo momakowa;
Bedie komi koro babawa, winj nyithindo koywagore;
Bedie e komi Ohulo, seche oromo mar n’gado bura e weche nyithindi koro;
Rang Pinywa kuma wadakie koro, mondo inewa ka wagoyo chongwa piny;
Wuod Nyasaye wabiro iri mondo ikonywa;
Ganwa lweny ijolwa; Kechwa ihumwa;
Kaw lembwa, Walem mayom e n’guono Nyasaye, Amen.

3.        Japuonjwa parie gima ne okelie e thurwa e dier joraten’g;
Donge ne ibiro mondo ichiwnwa polo, ne ibiro mondo Irwakwa e ngima;
Donge wan e mane ibiro mondo wadog jotakatifu;
Wan e mane ibiro mondo waneyie ler;
Omiyo Simeo chik iti ka waywak;
 Kik ikunwa, kik ijwan’gwa; Kik iwewa kendwa wan poya;
Yawnwa dhoranga polo; mondo lembwa kik kal nono;
Winjwa, wakwo mayom e n’guono Nyasaye, Amen.

4.        Ayaaye, Laurida yo, kingi ma Jerusalem;
Jadolo ma Kalafare yo, wabiro iri waywak;
Wuod Angoro Awasi, wagoyo chongwa piny;
Wuod min Dina kik iwewa kendwa;
Agweny wuod Nyototo, winj nyithindi koro;
Fadha William Onyango, chung idolnwa koro;
Yaaye Ohulo, Lodvikus yo;
Chandruokwa ema oyudhowa mondo wabi iri ka;
Marichowa okelowa kuomi, wabiro mondo iluokwa;
Tuochewa okelowa kuomi, wabiro mondo ichangwa;
Nyosrowa okelowa kuomi, wabiro mondo itegwa;
Japuonj ma Nazareth chikie iti seche oromo;
Jakony jok modhier kony nyithindi koro;
Jaluong jok molal nyiswa yori koro;
Jachung jok mapodho kichungie nyithindi koro;
Laurida, winjwa mondo ikonywa;
Walem mayom e n’guono Simeo, Amen.

5.        Aluongie Simeo, wuon law abola;
Aluongie Enure, wuon Kiwasi;
Aluongie Laurida, Jabura;
Koro aluongo Ohulo, jakor weche;
An aluonge Hosea, wuon Lejo;
En e Lodvikus, Melkio;
 Wuon ler, wuon ngima;
Jal ma nyinge thoth, Jal marahono;
Wuod Nyasaye chung malo; chung malo rombe ywak;
Rwakie lawi mar duon’g mondo igwedhwa koro;
Jadolo bedie komi koro, mondo ikudhwa;
Seche oromo, winj jogi;
Kaw lembwa, konywa;
Mondo, walem mayom e n’guono Simeo, Amen.

6.        Ruodhwa Simeo, saa ochopo;
Saa ochopo mikonye oganda, konywa;
Ma e saa migwedhe rombe, ka gikwayoi;
Donge ma e saa miware chunje;
Wuonwa;
Melkio kudh nyithindi koro, gi muchi;
Seche oromo mar kudho ogandani;
Ohulo hul weche koro ne nyithindo;
Seche oromo mar hulo weche;
Japuonjwa puonj nyithindi koro;
Saa ochopo mar puonjo oganda;
Ahuka yamo lorie piny koro;
Seche oromo mar piyo e adundowa;
Konywa, walem mayom e n’guono Simeo, Amen.

7.        Melkio siso oloyowa kodi, Wuonwa;
Wabudho ne duondi, Japuonj maber, aa malo;
Wan gi gombo koda dwaro, bi puonjwa;
Wuonwa;
Yaaye Hosea kidhum kuomwa an’go, winj jogi;
Wuon orengo;
Wuon Lejo kipon’gwa an’go;
Kidi ma jogedo ojaro, bi sirwa;
Yaaye lwandawa;
Lwanda joka Esau, wuon loch polo, wuon ngima;
Sibuor mar dhood Luo wabiro koro, winjwa;
Winj nyithindo;
Kaw lembwa, Walem mayom e n’guono Simeo, Amen.

8.        Saa yomba Ohulo, saa yomba koro;
Seche kalo, aa malo;
Saa yomba kapok amoso Messia,
Saa yomba kapok awinjo Melkio,
Wuonwa;
Saa yomba kapok aneno Laurida,
Saa yomba kapok aneno Enure,
Kingiwa;
Saa kalo to pok imosowa, wuon ngima, kimoswa an’go;
Seche kadho to pok ipuonjowa, Japuonj maber, kipuonjwa an’go;
Wuog ipuonjwa, nyithindo ogombo mosoi;
Wuog imoswa, rombe ogombo winjo duondi koro;
Santa Maria;
Mos nyithindo koro;
K imoswa ni Oyawore, wabudhoni, Kingiwa;
Kikelnwa mos polo, wagomboi koro;
Wuonwa;
Kechwa, walem mayom e n’guono Simeo, Amen.

9.        Nyasach Jorotenge, winj Ywakwa;
Nyasach gi Abala Rafael, Nyasach gi On’gombe Romanus;
Nyasach gi Othuogo kod Owuonda;
Nyasach gi Mumbo Karilus, Nyasach gi Oongo Tobias;
Nyasach gi Otieno Petro, Nyasach gi Akinyi Siprosa;
Nyasach gi Ombwayo Maria, Nyasach gi Dorina Baru;
Konywa, wuon Lejo;
Nyasach gi Okweto Silvesta, Nyasach gi Aguga Romanus;
Nyasach gi Habat Aloo, Nyasach gi Chiaji Lawrende;
Nyasach gi Atila Timotheo, Nyasach gi Odero Pilipo;
Nyasach gi Sila wuod Imbo, Nyasach gi Kefa wuod Asumbi;
Gwedhwa, yuorwa lweny, kingi Lejo;
Ayaaye Melkio, Hosea;
Nyasach gi Adika Rafael, kikonywa an’go, wuon Lejo;
Wuon ler;
Nyasach Helena gi Odongo, gwedhwa, kik ijwan’gwa;
Ahuka yamo, kony nyithindo;
Kechwa, walem mayom e n’guono Simeo, Amen.

10.      Wuonwa, ka iyie, Ohulo ka iyie, kony nyithindi koro;
Wuon Lejo, ka iyie, Rakula ka iyie, puonj nyithindi koro;
Wan dan’g wachom kure ka ionge, ka ruoth ojwan’gwa;
N’ga mon’gadnwa rieko kilin’g alin’ga, Wuonwa;
N’ga mopuonjwa ka ruoth olin’g ka momo, koro ere;
Polo wacho an’go, polo owacho an’go gi lembwa;
Armos owacho nade gi lembwa;
 Paradiso gi Silita opango nade gi lembwa;
Kiptoria gi Kiblongoria, Ararat gi Paw Romo owacho nade gi lembwa;
Ereu jopolo, kare ulin’g nan’go;
Ere Josef othoro, debe rakoko, ilin’g nan’go;
Ere Agatha nyar Katania, nyar miruti, ilin’g nan’go;
Ere Lusia koda Jasinta, nyi Fatima ulin’g nan’go;
Ere Susana nyar Alekia, kata Susana nyar Daudi, kare ulin’g nan’go;
Ere Abraham ka Tera, kata Daudi wuod Jese, kare ulin’g nan’go;
Samson ka Manoa, Isaya wuod Amoz, Zakaria ka Barakia, ulin’g nan’go;
Ere Sesilia jawer, kata Katherina nyar Siena, laktar kikonywa an’go;
Ere Helena nyar Goza, Musa wuod Amam, kata Joshua wuod Nun, jopolo kukonywa an’go;
Ere malaika Gabriel, jaote, kata malaika Rafael jakopo, kare ulin’g nan’go;
Walem mayom e n’guono Simeo, Amen.

11.      Polo yawre ayawa, polo yawri ayawa koro;
Polo yawri ayawa, polo mondo oyawre koro;
Kiyawri kaka ne iyawori chien’g Pentekosti ka dhoot ochiegi Jerusalem;
Kiyawri kaka ne iyawori migolo Paulo gi Sila e jela;
Kiyawri kaka ne iyawori migolo Petro gi Johana e Jela;
Kiyawri kaka ne iyawori chien’g lor Simeo e dier joraten’g;
Kiyawri kaka ne iyawori ka Johanes Baru chien’g Pentekosti e dier joraten’g;
Polo yawri koro, polo mondo oyawrenwa;
Oganda mane owero Kyria mondo olor;
Oganda malaika mondo olor;
Oganda Jotakatifu mondo olor;
Silita Kiyawri, Kiptoria mondo oyawre;
Kiblongoria Kiyawri, Sayun mondo oyawre;
Armos Kiyawri; Paradiso mondo oyawre;
Simeo mondo olor, Hosea mondo omoswa;
Enure mondo olor, Laurida mondo opuonjwa;
Melkio mondo olor, Santa Maria mondo ogwedhwa;
Lodvikus, mondo opuonjwa; polo mondo opuonjwa koro;
Walem mayom e n’guono Simeo, Amen.

Wednesday, December 16, 2015

GANO KUOM MARIA 2: PRAISES TO MAMA MARIA

1.         Bikra Maria wabiro iri, wagoyo chongwa piny mondo ikonywa;
Maria wan poya ok wan’geyo lemo;
Yiewa nok ahinya;
Chunywa bende osiko gi luoro;
Ka wawinjo lit waparore, chunywa bayo maonge kwe;
Seche tuo wabet gi buok, waonge chir wasiko gi luoro;
To Mama in ohingawa, in ohinga machielnwa;
Bende Mama in okumbawa, in okumba magen’gonwa;
Ma emomiyo wabiro iri, wabiro mondo iyuorwa lweny.
Konywa, walem mayom e ng’uono Nyasaye. Amen.
2.         Mamawa ka iyie, wuog oko seche oromo mar konyo rombe;
Wan e rombe mane ineno ka omoko e mudho;
Wan e rombe mane ilor mondo igol e lak wasigu;
Wan e nyikwa Esau momoko e dhier koda chandruok;
Nee kaka nyithindi pod omoko e kind ondiegi;
Maria Jobil ni oko, Jonawi bende ni oko;
Ajuoke ni oko, jo majinde bende ni oko; Jolamji gi jokorji bende ni oko;
Maria jochwad lwetgi ni oko; johum gi jokuon’gji bende kamano;
Jotun’g gi jokor miere; jokudh buru gi jonan’g buru opon’go gwenge;
Ma emomiyo wabiro ywakni mondo ikonywa; Yuorwa lweny kik iwewa kendwa;
Konywa, walem mayom e nguono Nyasaye. Amen.
3.         Ayaaye Mama, minwa, miyo mathuon maok we rombe e lweny kendgi;
Maria majaum nyithindo e bwombe seche ma lweny omoko;
Kiumie nyithindo koro, seche oromo mar humo rombi;
Kipandie nyithindi koro, seche ochopo mar pando ogandani;
Yaaye Mama, minwa;
Maria kirwakrie koro ne lweny, seche oromo, chung malo;
Ma e saa mane inyonoe thuol, mon’gogo mach, Esbon piny Jo-Reno;
Yaaye Mama, minwa;
Kinyonie jochiende momako miere, koda gwenge;
Kinyonie jochiende momako rin’go koda choke;
Kinyonie jochiende momako chunje, mag ogandani;
Kinyonie tuoche maricho momako ogandani;
Yaaye Mama, minwa;
Konywa, walem mayom e n’guono Nyasaye. Amen.
4.         Maria kwanwa Keya mag polo mondo okonywa lweny;
Iluongnwa jomalaika mondo okonywa lweny;
Iluongnwa Gabriel ma jaote mondo olor; seche oromo mar chopo ote;
Iluongnwa Latilati majaringo lelo mondo oyuorwa lweny; seche oromo mar riembo jachien;
Iluongnwa Mikael Jaduon’g jolweny mondo okonynwa lweny;
Iluongnwa Rafael mondo oyuorwa lweny; seche oromo mar kowo rombe;
Ere Uriel jamalaika mar chier, mondo ochier chunje ogandani;
Ere Serafim kod Kerubim; seche oromo mar konyo rombe;
Yaaye Mama, minwa;
Ikwanwa polo mondo okonywa, mondo ogolwa e lwet wasigu;
Are kwanwa, walem mayom e n’guono Nyasaye, Amen.
5.         Maria luongnwa jotakatifu mondo oyuorwa lweny;
Iluongnwa Agatha nyar Katania, wuon miruti mondo okonywa lweny;
Iluongnwa Joj William, ja Ungereza, wuon ton’g dindo, mondo okonywa lweny;
Iluongnwa Samson wuod Manoa, obange, mondo okonywa lweny;
Iluongnwa Daudi wuod Jese, mondo okonywa lweny;
Yaaye Mama, minwa, seche oromo;
Kiluongnwa Abraham wuod Tera koro mondo ondik lembwa;
Kata Josef wuod Jakob, jalok lek, mondo okonywa;
Isaya wuod Amoz, Joshua wuod Nun, koda Ezekiel janabi mondo okonywa;
Katherina ma nyar Siena, Ana ma nyar Fanuel, koda Kristina nyar Laban mondo okonywa;
Luongnwa Abel maka Adam, Enoka koda Elija mondo okonywa;
Maria wak polo duto tee, mondo okonywa.
Are konywa, walem mayom e ng’uono Nyasaye, Amen.
6.         Maria koro luongnwa yawuot jorotenge manodonjo e polo mondo okonywa;
Iluongnwa Timotheo Atila, wuon kifungu mondo oyawnwa;
Iluongnwa Petro Otieno wuod Kamagambo, mondo ochun’gnwa;
Iluongnwa Kefa ma wuod Asumbi, mondo ochun’gnwa;
Luongnwa Odero Pilipo, manodonjo e polo, mondo ochun’gnwa;
Iluongnwa Klement Angi, wuod joraten’g mondo ochun’gnwa;
Ere Sila wuod Imbo, Karilus Mumbo wuod Okumu, kata Tobias Oongo, mondo ochun’gnwa;
Kata ere jochun’g ma Uganda mondo okonywa;
Ere Karoli Lwanga, kata Kizito Kivuge, mondo oyuorwa lweny;
Yaaye Maria, kwanwa;
Miwa hawi, walem mayom e n’guono Nyasaye, amen.
7.         Donge in e Maria mane odonjo e gwengewa, mokelo konyrruok;
Donge in e Maria mane juogi owinjo moywak oa; oweyo oganda;
Donge in e Maria mane Jin owinjo moringo oa kuom oganda;
Donge in e Maria mane ogolo rise koda nawi kuom ogandawa;
Kendo in e Maria mane omiyo ajuoke owan’go ndagla koda nawi;
Min Lejo;
Maria ma tekone thoth ahinya, kikonywa an’go;
Min konyrruok kigol chandruok kuomwa an’go;
Min hawi kigol kuon’g kuom ogandawa an’go;
Tiekie kuon’g mag anyuola kuom ogandawa;
Riembie jochiende modak eudi mag ogandawa;
Ichiwie hapi, koda kwe, koda hera, koda mor;
Konywa, walem mayom e n’guono Nyasaye, Amen.
8.         Maria kik iwewa kendwa, minwa;
Yaaye Mama, kik ijwan’gwa;
Go wan’gi mamuol kuomwa ka chandruok omakowa;
Kik ikunwa nikech marichowa; to parwa kinde duto;
Maria kik iloknwa n’geyi, nimar kiloko n’geyi to walal tee;
Nan kodwa ikonywa, kendo luorwa isirwa;
Miwa ler ka mudho olil, kod geno e kinde rach;
Siemnwa yo ka wabagni, kel ber ne ogandani;
Gwedhwa, walem mayom e n’guono Nyasaye, amen.
9.         Bikira Maria wan emane igonwa ligala;
Donge wan emane igonwa ligand lemo, mondo wayud konyrruok kod ngima;
Maria kik iwe ligandi dhi nono, minwa;
Ichwakwa e lemo, to golnwa nyosro koda nyawo motamowa lemo;
Igurwa e puonjni, kendo golwa e timbe piny koda gik moko duto misekwerowa;
Iritie chunje nyithindi, kendo mi abilani odongre kendo obed gi nyak;
Ikwanwa neema, mondo watim gik mowinjore bedo jolup wuodi kindewa duto;
Minwa, konywa;
Miwa hawi, walem mayom e n’guono Nyasaye, Amen.
10.       Maria Mama, min kwe,
Min boch, min ratiro koda adiera;
Kel kwe e miere koda gwenge;
Ikwanwa ngima kod kinde mathoth kuom jachwechwa;
Ikwanwa ber e tijewa, nyak e puothewa, kod mor e ngimawa;
Ikwanwa neema mar n’guono ne jok makethonwa,
Kendo hero Jowadwa koda hero Nyasachwa ndalo duto;
Bende Ikwanwa ngima mochwere ban’g tho mar ringruok;
Mondo wadonj e polo kendo wapwo Nyasaye ndalo duto, higni gi higni, amen.